աննամուս.blog.ինքնահրատ: March 2014

Մանիֆեստ

վասն »Գառնի» պատմամշակութային

արգելոց-թանգարանում կառուցվող »սրճարանի»

Փաստարկ 1 ՀՀ ՄՇԱԿՈՒՅԹԻ ՆԱԽԱՐԱՐՈՒԹՅԱՆ «ՊԱՏՄԱՄՇԱԿՈՒԹԱՅԻՆ ԱՐԳԵԼՈՑ-ԹԱՆԳԱՐԱՆՆԵՐԻ ԵՎ ՊԱՏՄԱԿԱՆ ՄԻՋԱՎԱՅՐԻ ՊԱՀՊԱՆՈՒԹՅԱՆ ԾԱՌԱՅՈՒԹՅՈՒՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ տնօրենը շեշտում է, թե սրճարանը սեզոնային է լինելու, աշխատելու է մայիս-հոկտեմբեր ամիսներին:

Հակափաստարկ 1 Բնականաբար, եթե սրճարանը բացօթյա է, ապա ո՞ր մի տուրիստը ձմռանը կնստի դրսում և սուրճ կխմի:

Փաստարկ 2 Նույն ՊՈԱԿ-ի ղեկավարը շեշտում է, թե սրճարանը կառուցվում է, որպեսզի խթանվի մարդկանց հոսքը և զարգանա տուրիզմը:

Հակափաստարկ 2 Սա ի սկզբանե շատ ծիծաղելի թեզ է.

Ա/ Ինչու՞ է տուրիզմի զարգացման մասին մտածում սույն ՊՈԱԿ-ի ղեկավարը: Միթե՞ էկոնոմիկայի նախարարության զբոսաշրջության վարչությունն այլևս գոյություն չունի:

Բ/ Նույնիսկ եթե ընդունենք, թե սույն ՊՈԱԿ-ի վրա դրվել են տուրիզմ զարգացնելու գործառույթներ, ապա կառաջարկեի նախ մտածել հետևյալ կետերի մասին, հետո նոր՝ սրճարանի.

ա/ Երևան-Գառնի ճանապարհի ողբալի վիճակը, մասնավորապես այն առավել տխուր է Չարենցի կամարի մոտ և Ողջաբերդ-Գեղադիր գյուղերի միջև ընկած հատվածում:

բ/ Նորմալ ավտոկայանատեղիի բացակայությունը հնավայրի մուտքի մոտ: Սեզոնի ժամանակ տուրիստական երկու մեծ ավտոբուսը հերիք է, որպեսզի ամբողջովին խցանվի ներկայիս կայանատեղին:

գ/ Հյուրատների կամ հյուրանոցի բացակայությունը

դ/ Վերջին անգամ երբ այցելեցինք Գառնի, պարզվեց որ մուտքի մոտի հուշանվերների խանութի տակ գտնվող զուգարանը չի աշխատում: Ստիպված օգտվեցինք հնավայրի՝ խորհրդային շրջանում սարքված անմխիթար զուգարանից, որը չուներ դռներ և լուսավորություն:

Փաստարկ 3 Շեշտվում է, թե սրճարանն այնպիսի կառույց է լինելու, որ չի կառուցվելու բառի բուն իմաստով, այսինքն ֆունդամենտ չի փորվելու, այն տեղադրվելու է գետնին մետաղե կոնստրուկցիաներով և շատ հեշտ հավաքվելու է: Հատկապես գործածվում է »թեթև կոնստրուկցիաներով սրճարան» բառակապակցությունը:

Հակափաստարկ 3 Ա/ Թե ինչ են հասկանում մշակույթի նախարարությունում »թեթև կոնստրուկցիա» ասելով, մենք հրաշալի գիտենք Փակ շուկայի օրինակով: Բ/ Եթե այդ ամենը ճիշտ է, ապա ի՞նչ գործ ուներ »շինհրապարակում» ավազի և խճաքարի ահռելի քանակությունը:

Փաստարկ 4 Նշվում է, թե սրճարանի եկամուտն ուղղվելու է տարածքի բարեկարգմանը:

Հակափաստարկ 4 Եթե ընդունենք պաշտոնական վիճակագրական տվյալները, ապա 2013թ Հայաստան է այցելել 500.000-700.000 զբոսաշրջիկ: Եթե հաշվի առնենք այն փաստը, որ Գառնի անպայման այցելում է նրանց 80 տոկոսը, եթե ոչ ավելին, ապա ամենամինիմալ հաշվարկներով բյուջե է մտնում 400.000.000 դրամ կամ 975.000 ԱՄՆ դոլար /400.000 տուրիստ *1000 դրամ/: Կարծում եմ այս գումարն առավել քան բավարար է արգելոցի կարիքները հոգալու համար:

Փաստարկ 5 Շեշտվում է, թե սրճարանում մատուցվելու է միայն թեյ, սուրճ և թխվածքներ:

Հակափաստարկ 5 Նույնիսկ սրճարանային բիզնեսից չհասկացողին է պարզ, որ սուրճով ու թեյով եկամուտդ չնչին կլինի, էլ ուր մնաց թե սրճարանի բերած եկամուտով տարածքը բարեկարգեն:

Փաստարկ 6 Էլի անընդհատ շեշտվում է արտասահմանյան փորձը, թե՝ այ օրինակ Պոմպեյում կա նման բան:

Հակափաստարկ 6 Անձամբ եղել եմ Պոմպեյում և կարող եմ փաստել, որ բուն հնավայրի տարածքում, այսինքն մետաղե ցանկապատից ներս ուղղակի բացակայում է որևէ սրճարան, հուշանվերի կրպակ կամ սնվելու կետ: Դրանք բոլորն ահռելի քանակությամբ առկա են հնավայրի մուտքի մոտի հրապարակում և դեպի Պոմպեյ տանող ճանապարհին: Եվ բացի այդ, նույնիսկ եթե աշխարհի որևէ հնավայրում առկա է նմանատիպ կառույց, դա չի նշանակում թե մենք կուրորեն պետք է պատճենենք »արտասահմանյան փորձը»:

Փաստարկ 7 ՀՀ ՄՇԱԿՈՒՅԹԻ ՆԱԽԱՐԱՐՈՒԹՅԱՆ «ՊԱՏՄԱՄՇԱԿՈՒԹԱՅԻՆ ԱՐԳԵԼՈՑ-ԹԱՆԳԱՐԱՆՆԵՐԻ ԵՎ ՊԱՏՄԱԿԱՆ ՄԻՋԱՎԱՅՐԻ ՊԱՀՊԱՆՈՒԹՅԱՆ ԾԱՌԱՅՈՒԹՅՈՒՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ: Սա այն հիմնական կազմակերպությունն է, որ առաջ է քաշել սրճարան կառուցելու թեզը:

Հակափաստարկ 7 Այս ՊՈԱԿ-ի անվանման մեջ երկու սկզբունքային մաս կա. Ա/ պատմական միջավայրի պահպանման ծառայություն.....կարծում եմ շատ խելացի պետք չէ լինել հասկանալու համար, որ պատմամշակութային արգելոցի տարածքում 21-րդ դարի սրճարան կառուցելը բնավ պատմական միջավայրի պահպանում չէ: Բ/ պետական ոչ առևտրային կազմակերպություն.....ինչու՞ է ոչ առևտրային կազմակերպությունը զբաղվում տնտեսական գործունեությամբ:

Փաստարկ 9 Շեշտվում է, թե սրճարանը գրավչություն կբերի հնավայրին և կավելացնի մարդկանց հոսքը:

Հակափաստարկ 9 Այս թեզն ընդհանրապես քննարկել չարժի, քանզի ամենատխմարին էլ պարզ է, որ սրճարանը չի կարող գրավչություն ավելացնել Հայաստանում պահպանված միակ հեթանոսական տաճարին, ընդհակառակը, այն լիովին կխաթարի հնավայրի ամբողջականությունը:

Փաստարկ 10 Ասվում է, թե սա պիլոտային նախագիծ է, և եթե չարդարացնի՝ կդադարի գործել:

Հակափաստարկ 10 Իսկ եթե արդարացնի, սպասե՞նք սրճարանների ցանցի Հայաստանի մյուս հնավայրերում: Տես հղումը

http://armenpress.am/arm/news/743674/

Կամ ենթադրենք թե սրճարանն արդարացրեց ու բերած եկամուտներով ամբողջովին կարգի բերվեց հնավայրի տարածքը, հետո փակվելու է՞ սրճարանը:

Փաստարկ 11 Նշվում է ռուսաստանաբնակ Կարեն Մայիլյանի անունը, թե իբր նա 6 միլիոն դրամի ներդրում է արել: Նշվում է նաև, որ սրճարանից առաջացած հասույթն ուղղվելու է տաճարի շրջակայքի բարեկարգմանը:

Հակափաստարկ 11 Փաստորեն բարեգործ բիզնեսմենը ներդրում է անում, որպեսզի Գառնին բարեկարգվի: Իսկ ավելի հեշտ չի՞ լինի բարեգործի ներդրած գումարները միանգամից ուղղել բարեկարգմանը:

Հարցեր

1. Ինչու՞ Գառնի արգելոցը մինչև այսօր չունի կադաստրային վկայական

2. Ինչու՞ է շինարարությունը սկսվել առանց համապատասխան փաստաթղթերի: Տես հղումը

http://www.panorama.am/am/society/2014/03/04/garni/#.Uxc-gmXfr8k.facebook

Ա.Պետրոսյան

Երևան, 2014